Аллоҳнинг қўшнилари кимлар?

1246

«Ал-бидая ван ниҳая» китобида келган. Имом Табароний Али ибн Ҳусайндан ривоят қилади:

«Қиёмат кунида нидо қилувчи аҳли фазллар турсин деб», нидо қилади. Бир жамоа инсонлар ўрнидан туради. Уларга:

-Жаннатга боринглар, дейилади. Фаришталар уларни кутиб олади. Улар:

-Қаерга кетяпмиз?

Фаришталар:

-Жаннатга, дейди.

-Ҳисобдан олдин-а?

-Ҳа!

-Сизлар кимсиз?

-Биз, Аҳли фазлмиз.

-Фазлингиз нима эди?

-Бизга жоҳиллик қилинса ҳалим, зулм қилинса сабр, ёмонлик қилинса кечириб юборар эдик.

-Жаннатга киринглар. Бас, амал қилувчиларнинг ажри қандай яхши, дейилади.

Сўнгра нидо қилувчи сабр аҳли турсин, дейди. Бир тоифа инсонлар турадилар. Уларга:

-Жаннатга боринглар, дейилади.

Фаришталар кутиб олиб, уларга ўхшаш гапларни айтадилар. Улар:

-Биз сабр аҳлимиз.

-Сабрингиз нима бўлган?

-Аллоҳнинг тоатига, Унга маъсият этишдан ва ҳамда балоларга сабр қилдик. 

-Жаннатга киринглар. Бас, амал қилувчиларнинг ажри қандай яхши, дейилади.

Сўнгра нидо қилувчи нидо қилади «Аллоҳнинг (охират) ҳовлисида қўшнилари турсин», дейилади. Бир тоифа инсонлар туради. Улар озчилик бўлади. Уларга ҳам: «Жаннатга киринглар», дейилади. Фаришталар уларни кутиб олиб, олдингиларга ўхшаш сўзларни айтадилар.

-(Охират) ҳовлисида нима сабабли Аллоҳга қўшни бўлишга эришдингиз?

-Биз Аллоҳ йўлида бир-биримизни зиёрат қилардик, Аллоҳ йўлида ҳаммажлис бўлардик, (боримизни) бир-биримизга сарфлар эдик, дейишади. Уларга ҳам:

-Жаннатга киринглар. Бас, амал қилувчиларнинг ажри қандай яхши, дейилади.

Ҳайруллоҳ домла Сулаймонов,

Андижон вилоят бош имом-хатиби ўринбосари.